एजेन्सी,माघ २० ।
इङ्लिस प्रिमियर लिग फुटबल अन्तर्गत गएराती भएको खेलमा म्यानचेस्टर सिटी विजयी भएको छ भने म्यान्चेस्टर युनाईटेड बराबरीमा रोकिएको छ ।
वेष्ट ह्याम युनाईटेडको मैदानमा भएको खेलमा म्यानचेस्टर सिटी ४–० ले विजयी भएको हो । म्यानचेस्टर सिटीलाई विजयी गराउन केभिन डे ब्रायन, डेभिड सिल्भा, ग्याब्रिएल जिसस र याया टुरेले एक–एक गोल गरेका हुन् ।
यस्तै गएराती नै भएको अर्को खेलमा म्यानचेस्टर युनाईटेडले भने हल सिटीसँग गोलरहित बराबरी खेलेको छ । यसैगरी स्टोक सिटीले एभर्टनसँग १–१ गोलको बराबरी खेलेको छ ।
रातिका खेलपछि प्रिमियर लिग फुटबलमा २३ खेलबाट ५६ अंक जोडेको चेल्सी शीर्ष स्थानमा छ । समान खेलबाट ४७÷४७ अंक जोडेका टोटनह्याम हट्सपर र आर्सनल क्रमशः दोस्रो तथा तेस्रो स्थानमा रहेका छन् ।
चौथो स्थानको लिभरपुलको भने ४६ अंक छ । समान ४६ अंकको साथ म्यानचेस्टर सिटी पाँचौ स्थानमा रहँदा छैठौं स्थानको म्यानचेस्टर युनाईटेडको ४२ अंक छ ।
