काठमाडौं, माघ १९ ।
दृष्टिविहीन विश्वकप ट्वेन्टी–ट्वेन्टी क्रिकेट प्रतियोगिताको दोस्रो खेलमा आज नेपालले दक्षिण अफ्रिकाको सामना गर्दै छ ।
भारतको नयाँदिल्लीमा जारी प्रतियोगिता नेपाली टोली आज पहिलो जितको खोजीमा मैदान उत्रने छ । यस अघि हिजो भएको पहिलो खेलमा नेपाल अष्ट्रेलियासँग १० विकेटले पराजित भएको थियो ।
टस जितेर पहिले ब्याटिङ गरेको नेपालले निर्धारित २० ओभरमा ८ विकेट गुमाएर १ सय ४३ रन बनायो । जवाफमा १ सय ४४ रनको लक्ष्य अस्ट्रेलियाले १३ औं ओभरमा विना कुनै विकेटको क्षतिमा पार गरेको हो ।
प्रतियोगितामा नेपाल र अष्ट्रेलिया बाहेक भारत, पाकिस्तान, श्रीलंका, न्यूजिल्याण्ड, दक्षिण अफ्रिका, इङ्ल्यान्ड र बंगलादेशले सहभागीता जनाएका छन् ।
सबै ९ टोलीले राउण्ड रबिन लिगको आधारमा एक अर्कासँग प्रतिस्पर्धा गरे पछि शीर्ष चार टोली सेमिफाइनलमा पुग्नेछन् । प्रतियोगिता आगामी फेब्रुअरी १२ तारिख सम्म सञ्चालन हुने छ ।
