काठमाडौ १८ माघ ।
व्यवस्थापिका संसदको अन्तर्राष्ट्रिय सम्बन्ध तथा श्रम समितिको बैठक आज बस्दैछ । सिंहदरबारस्थित समिति कार्यलयमा बस्ने बैठकमा विभिन्न मुलुकमा रिक्त रहेका राजदुत नियुक्तिमा भइरहेको ढिलाइबारे छलफल हुने जनाएको छ ।
राजनितिक भागभण्डा मिल्न नसक्दा १३ मुलुकमा लामो समयदेखि रिक्त रहेका राजदुत नियुक्ति हुन सकेको छैन । बैठकमा परराष्ट्रमन्त्री प्रकाशशरण महत तथा मन्त्रालयका सचिवलाई छलफलका लागि बोलाइएको समिति सभापति प्रभु शाहले जानकारी दिनुभयो ।
लामो समयदेखि राजदुत नियुक्ति हुन नसक्दा नेपालको कुटनितिक क्षेत्र प्रभावित भएको भन्दै आलोचना भइरहेका बेला समितिको बैठक बस्न लागेको हो । बैठकमा राजदुतसहित कुटनितिक नियोगमा नियुक्ति प्रक्रियामा ढिलाइ हुनुको कारणसहित परराष्ट्र मन्त्रालयलाई उपस्थित हुन भनिएको छ ।
नेपालले विभिन्न २९ मुलुकमा आवासीय दुतावास स्थापना गरेको छ । जसमध्ये १३ नियोगमा राजदुतबिहिन छ । अघिल्लो सरकारले २१ देशमा राजदुत सिफारिस गरिएकामा १४ देशका राजदुत सिफारिस वर्तमान सरकारले फिर्ता लिएपछि रिक्त राजदुत नियुक्ति प्रक्रिया अन्योलमा परेको हो ।
