काठमाडौ १७ माघ ।
प्रधानमन्त्री पुष्पकमल दाहालले संविधान कार्यान्वयनका साथै स्थानीय निकायको निर्वाचनमा सहयोगी र सकारात्मक भूमिका निर्वाह गर्न सञ्चारमाध्यमसँग अपिल गर्नुभएको छ ।
नेपाल टेलिभिजनको ३२ औँ वार्षिकोत्सवको अवसरमा राजधानीमा आयोजना गरिएको कार्यक्रमलाई सम्बोधन गर्दै उहाँले संविधान कार्यान्वयनसँगै सिङ्गो मुलुकलाई आर्थिक विकासको बाटोमा अगाडि बढाउन सञ्चार माध्यमको महत्वपूर्ण भूमिका रहने बताउनु भयो ।
प्रधानमन्त्री दाहालले संविधान संशोधनसँगै स्थानीय निकायको निर्वाचन गर्ने सरकारको योजनामा सकारात्मक र रचनात्मक भूमिका निर्वाह गर्न आग्रह गर्नुभयो । संविधानप्रतिको स्वीकार्यतालाई बढाउन संशोधनको प्रक्रिया अगाडि बढाइएको उहाँको दावी छ ।
उहाँले २०४१ सालमा परियोजनाको रूपमा स्थापित भई २०४२ सालबाट नियमित प्रसारण सुरू गरेको नेपाल टेलिभिजनले अबका दिनमा सरकार र जनताबीचको पुलको रूपमा काम गर्दै जाने विश्वास गर्नुभयो ।
प्रधानमन्त्री दाहालले लोकतन्त्रको मूल्य र मान्यता अनुसार सञ्चारमाध्यमको निष्पक्षता, सम्पादकीय स्वतन्त्रताको राज्यले सधैँ सम्मान गर्दै आएको दावी समेत गर्नुभयो ।
