काठमाडौँ, १६ माघ । प्रधानमन्त्री पुष्पकमल दाहालले निर्वाचन आयोगका प्रमुख आयुक्त डा अयोधीप्रसाद यादवलाई स्थानीय तहको निर्वाचनको तयारीमा रहन निर्देशन दिनुभएको छ ।

प्रधानमन्त्री निवास बालुवाटारमा आज भएको छलफलमा प्रधानमन्त्री दाहालले राजनीतिक सहमतिका आधारमा आगामी जेठको पहिलो साताभित्रै निर्वाचन गर्ने गरी मिति घोषणाको गर्ने सरकारको तयारी रहेकाले तयारी अवस्थामा रहन निर्देशन दिनुभयो ।

बैठकबाट बाहिरिदै  प्रमुख आयुक्त यादवले प्रधानमन्त्री र आफूबीच स्थानीय तहको निर्वाचन कानुन, मिति घोषणा हुदा  र नहुदाको जटिलता, निर्वाचनका लागि गर्नुपर्ने प्राथमिकताका कामकारबाहीबारे छलफल भएको बताउनु भयो ।

सो अवसरमा प्रधानमन्त्री दाहाललाई प्रमुख आयुक्त यादवले आयोगले आगामी फागुन ७ गतेलाई निर्वाचन दिवसका रुपमा मनाउन लागेका बारेमा पनि जानकारी गराउनुभएको थियो ।