काठमाडौ १० माघ ।
नेकपा एमालेका वरिष्ठ नेता माधवकुमार नेपालले मुलुकलाई राजनीतिक शून्यताबाट देशलाई जोगाउन अहिले तीन तहको निर्वाचन गर्न आवश्यक रहेको बताउनु भएको छ ।
उहाँले व्यवस्थापिका संसदमा पेश भएको संविधान संशोधन प्रस्तावलाई थाँती राखेर निर्वाचन सम्बन्धी कानुन पारित गरी निर्वाचन आयोगलाई बुझाउन पर्ने बताउनु भयो ।
प्रेस चौतारी नेपाल कास्कीले आज पोखरामा आयोजना गरेको पत्रकार भेटघाटमा बोल्दै नेता नेपालले अनेकौं बाहनामा निर्वाचनलाई सार्ने चालबाजी भइरहेको भन्दै चिन्ता व्यक्त गर्नुभयो ।
उहाँले आगामी माघ ७ गते तीनै तहको निर्वाचन गराएर नयाँ जनप्रतिनिधिलाई जिम्मेवारी हस्तान्तरण गरेपछि मात्रै संविधान कार्यान्वयन हुनसक्ने धारणा राख्नुभयो ।
संविधान संशोधन मधेसी आम जनताको माग नभएको उहाँको दावी छ । संविधान संशोधनलाई विफल पार्ने एक तिहाइ सांसदको संख्या विपक्षीसँग सुरक्षित रहेकाले प्रस्ताव कुनै हालतमा पास नहुने जिकिर गर्नुभयो ।
उहाँले कुनै लोभ, लालच र प्रलोभनमा नपरी देशभक्तिको भावनामा अडिग रहन पनि सबैसँग आग्रह गर्नु भएको छ ।
