म्याग्दी, ८ माघ ।
नेकपा एमालेका सचिव प्रदीप ज्ञवालीले संबिधान संशोधन बिधेयकलाई यथास्थितिमा राखेर राजनीतिक समझदारी कायम गर्न सकिने बताउनुभएको छ ।
प्रेस चौतारी म्याग्दीले आज बेनीमा आयोजना गरेको पत्रकार सम्मेलनमा बोल्दै सचिव ज्ञवालीले सरकारले संसद्मा दर्ता गरेको संशोधन प्रस्तावलाई थाँती राख्ने प्रतिबद्धता जनाए राजनीतिक गतिरोधको अन्त्य हुने बताउनुभयो ।
उहाँले सरकार जबरजस्त संसोधन बिधेयक पारित गराउनेतर्फ लागे राजनीतिक असमझदारी झन चुलिनुका साथै संविधान कार्यान्वयनमा पनि जटिल हुने बताउनु भयो ।
संविधान कार्यान्वयनका लागि आगामी एक वर्ष्भित्र तीनवटै तहको निर्वाचन गर्ने वातावरण बनाउन सबै दलबीच सहमतीको प्रयास भईरहेको सचिव ज्ञवालीको भनाई छ ।
संविधान जारी गर्ने बेलामा एक ठाउँमा उभिएका राजनीतिक शक्तिबीच समझदारी बनेमा मधेसवादी दल असहमतिका बाबजुद पनि निर्वाचनमा सहभागी हुने उहाँले दाबी गर्नुभयो ।
सचिव ज्ञवालीले निर्वाचनका लागि आवश्यक कानुन निर्माण, निर्वाचन क्षेत्र निर्धारण आयोगको गठन र स्थानीय तहको सङ्ख्या तथा सिमाना निर्धारण आयोगको प्रतिवेदन कार्यान्वयनलाई प्राथमिकता दिनुपर्ने बताउनुभयो ।
