काठमाडौ ७ माघ ।
परराष्ट्र मन्त्री डा. प्रकाशशरण महतले कूटनीतिक सम्बन्ध सडकमा आन्दोलन गरेर नसलटिने बताउनु भएको छ । चितवनमा आज सन्चारकर्मीसँग कुरा गर्दै उहाँले सडकमा गालीगलौज गर्दा कूटनीतिक सम्बन्ध थप बिग्रिने बताउनु भयो ।
छिमेकी देश चीन र भारतसँग कुटनीतिक सम्बन्ध सुमधुर हुँदै गएको भन्दै उहाँले खुल्ला सीमा, डुबान समस्या लगायतका कारण भारतसँग समस्या भएपनि चीनसँगको सम्बन्धमा त्यस्तो केही तिक्तता नरहेको बताउनुभयो ।
चीनतर्फको कोदारी नाका खोल्न चीन सरकार तयार रहेको भन्दै उहाँले केरुङलाई विस्तार गर्ने विषयमा पनि छलफल भइरहेको बताउनुभयो । चिनियाँ राष्ट्रपतिको नेपाल भ्रमणको तयारीका लागि छलफल गर्न सचिवस्तरीय संयन्त्रलाई पत्र लेखिसकिएको पनि उहाँले बताउनुभयो ।
यस्तै उहाँले गण्डक सम्झौता कार्यान्वयनका लागि दुई देशका बीचमा सहमति भइसकेको बताउनुभयो । उहाँले माघ महिनाभित्र नेपाली पक्षले डिपिआर तयार गरी नहरको पुनःसंरचना निर्माण भारतीय पक्षले गर्ने सम्झौता भएको बताउनुभयो ।
सो नहरबाट सम्झौताबमोजिम ४० हजार हेक्टर जमिन सिँचाई हुनुपर्नेमा २५ हजार हेक्टर मात्रै हुँदै आएको उहाँले बताउनुभयो ।
