काठमान्डौ माघ ६।
प्रधानमन्त्री पुष्पकमल दाहालसँग नेपालका लागि इण्डोनेसियाका राजदूत इवान विरान्ता अत्मड्जाले बिदाई भेट गर्नु भएको छ ।
आफ्नो चार वर्षे कार्यकालको समाप्तिसँगै अत्मड्जाले प्रधानमन्त्रीसँग बिदाई भेट गर्नु भएको हो । भेटका अवसरमा प्रधानमन्त्रीले राजदूत अत्मड्जाको कार्यकालमा नेपाल र इण्डोनेसियाबीचको सम्बन्ध थप सुमधुर भएको बताउनु भएको थियो ।
यस्तै प्रधानमन्त्रीले भूकम्पको विपत्तिका बेला इण्डोनेसियाले नेपाललाई राम्रो सहयोग गरेको भन्दै त्यसका लागि राजदूत र इण्डोनेसिया सरकारलाई धन्यवाद दिएको उहाँको नीजि सचिवालयले जनाएको छ ।
प्रधानमन्त्रीले आगामी दिनमा इण्डोनेसियासग पर्यटन, जलविद्युत र आर्थिक विकासका क्षेत्रमा नेपाल सहकार्य गर्न ईच्छुक रहेको धारणा समेत भेटका क्रममा राख्नु भएको थियो ।
बिदाई भेटका क्रममा राजदूत अत्मड्जाले आफ्नो कार्यकाल सफल पार्न नेपाल सरकारले गरेको सहयोग र सद्भावका लागि प्रधानमन्त्रीलाई धन्यवाद दिँदै दुई देशीय सम्बन्ध विस्तारमा आफ्नो कार्यकाल सफल भएको बताउनु भयो । साथै भेटमा राजदूतले नेपाललाई फ्रि र अनएराएवल भिसाको व्यवस्था गरिएको जानकारी दिनु भयो ।
