काठमाडौ ३ माघ ।
उर्जा सम्बन्धी विश्व सम्मेलनमा सहभागी हुन युएईमा रहनु भएका ऊर्जामन्त्री जनार्दन शर्माले त्यहाँका समकक्षी सुहेल महम्मद अल मजौरीसँग आज भेटवार्ता गर्नुभएको छ ।
राजधानी अबुधाबीस्थित ऊर्जा मन्त्रालयमा आज भएको भेटमा उहाँले नेपालको जलविद्युत् क्षेत्रमा लगानी गर्न युएइका ऊर्जामन्त्रीलाई आग्रह गर्नुभएको युएईस्थित नेपाली दूतावासका सहचारी केशवराज पोख्रेलले जानकारी दिनुभयो ।
मन्त्री शर्माले कम्तीमा आगामी सय वर्षसम्मका लागि नेपालमा जलविद्युत् विकासको राम्रो सम्भावना रहेकाले त्यसमा लगानी गर्न युएइ सरकारलाई अनुरोध गर्नुभएको छ ।
जवाफमा युएइका ऊर्जामन्त्री मजौरीले नेपालमा जलविद्युत, कृषि र पर्यटनमा लगानी गर्न आफूहरु इच्छुक जानकारी गराउदै दिगो ऊर्जा विकासका लागि जलविद्युत् र सौर्य ऊर्जालाई एकीकृत गरेर अघि बढाउन नेपाललाई सुझाव दिनुभयो ।
यसैबीच ऊर्जामन्त्री शर्मा अबुधाबीस्थित नेपाली राजदूतावास, नेपाली जनप्रगतिशील मञ्च युएइ र नेपाली बिजनेस काउन्सिलले आयोजना गरेका विभिन्न कार्यक्रममा सरिक हुनुभएको उहाँका स्वकीय सचिव वसन्तराज शर्माले जानकारी दिनुभयो ।
