भद्रपुर, ३ माघ ।
सामान्य प्रशासनमन्त्री केशवकुमार बुढाथोकीले सिंहदरबारको अधिकारलाई स्थानीय तहसम्म पुर्याउन सके मात्रै स्थानीय तहबाट जनता लाभान्वित हुने बताउनु भएको छ ।
प्रधानमन्त्री तथा मन्त्रिपरिषद्को कार्यालयले आज झापामा आयोजना गरेको अन्तक्र्रिया कार्यक्रमको उद्घाटन गर्दै उहाँले जनहितका काम गर्दा निजामती कर्मचारीले पनि आफ्ना दृष्टिकोणलाई फराकिलो पार्र्नु पर्ने बताउनु भयो ।
कर्मचारीको व्यवहारबाट नै मुलुकको आर्थिक सामाजिक र राजनीतिक क्षेत्रको विकास हुने मन्त्री बुढाथोकीको भनाइ छ ।
उहाँले मुलुकको राजनीतिक परिवर्तनसँगै प्रशासनको पनि पुनःसंरचना आवश्यक रहेको बताउनुभयो ।
सरकारले कर्मचारीको लागि स्वास्थ्य बिमा र निवृत्तकोष स्थापना गर्न आवश्यक छलफल गरिरहेको पनि मन्त्री बुढाथोकीले जानकारी दिनुभयो ।
कार्यक्रममा प्रधानमन्त्री तथा मन्त्रिपरिषद् सचिवालयका सचिव दिनेशकुमार थपलियाले संविधानको सफल कार्यान्वयनमा राजनीतिक संरचना, प्रशासनिक पुनःसंरचना र वित्तीय व्यवस्थापन हुनुपर्ने कुरामा जोड दिनुभयो ।
कार्यक्रममा जिल्लाका सबै सरकारी कार्यालयका प्रमुख, राजनीतिक दलका प्रतिनिधिको सहभागिता थियो ।
