पौष २८, काठमाडौं ।
नेपाल आदिबासी जनजाति महासङ्घले सरकारले व्यवस्थापिका–संसदमा टेबल गरेको संविधान संशोधन प्रस्तावमा समर्थन जनाउदै पारित गराउन प्रधानमन्त्रीसँग माग गरेका छन् ।
आज प्रधानमन्त्री पुष्पकमल दाहालसंग भेट गरी महासंघका प्रतिनिधीले संशोधन प्रस्तावमा आफूहरुको समर्थन रहेको जनाएका हुन् ।
भेटमा महासङ्घका अगुवाहरुले संविधान संशोधनले आदिबासी जनजातिहरुको भावनाको प्रतिनिधित्व गरेको बताउँदै संसदबाट पारित हुने व्यवस्थाका लागि पहल गर्न प्रधानमन्त्रीको ध्यानाकर्षण गराएका थिए ।
विगतमा भएका सहमतिको कार्यान्वयन गर्न, स्थानीय तह पूनर्संरचना आयोगबाट विशेष, स्वायत्त र संरक्षित क्षेत्रको निर्धारण गर्न पनि उनीहरुले माग गरेका छन् ।
भेटमा प्रधानमन्त्रीले राजनीतिक शक्ति सन्तुलनले भ्याएसम्म जनजातिका मुद्दाहरुको सम्बोधन गर्ने प्रयास गरिएको जानकारी गराउँदै प्रस्ताव पारित गर्न सबैको सहयोगको अपेक्षा गर्नुभयो ।
साथै प्रधानमन्त्रीले संघीय आयोगमार्फत् सम्बोधन गर्न बाँकी जनजातिका मुद्दाहरुको अधिकतम् सम्बोधनका लागि प्रयास गरिने जानकारी दिनुभयो ।
