काठमाडौ २६ पौष ।
उच्च अदालतमा न्यायधिश नियुक्ति गर्ने विषयमा छलफल गर्न न्याय परिषदको बैठक आजपनि बस्दै । बिहान ९ बजेपछि सर्वाेच्च परिसरमा बस्ने बैठकमा रिक्त रहेका ८० पदका लागि न्यायधिश नियुक्ती गर्ने विषयमा छलफल हुने जनाइएको छ ।
बरिष्ठतम् न्यायाधीश बैद्यनाथ उपाध्यायको पदावधि सकिन केही समय मात्र बाँकी रहेकाले उच्च अदालतमा रिक्त न्यायाधीशको त्यसअघि नै टुंगो लगाउने तयारी स्वरुप न्यायपरिषद्को बैठक निरन्तर बस्दै आएको छ ।
कुन समुहबाट कति जना ल्याउनेबारे परिषद सदस्यहरुबीच मतभेद देखिएपछि केही दिन यता लगातार बैठक बसेपनि नियुक्ति हुन सकेको छैन ।
८० पदका लागि जिल्ला न्यायाधीशबाट ३७ जना कानुन व्यवसायीबाट ३० जना र १३ जना न्याय प्रशासन सेवाबाट ल्याउने बिषयमा गृहकार्य भइरहेको स्रोतले जनाएको छ ।
यद्यपी यस विषयमा अन्तिम टुङ्गो लाग्न बाँकी छ । आजको बैठकले रिक्त रहेका पदमा नियुक्ति गर्ने सम्भावना रहेको परिषद् सदस्य समेत रहेका कानुन मन्त्री अजय शंकर नायकले जानकारी दिनुभयो ।
आजको बैठकबाट रिक्त पदपूर्ति गर्ने तयारी स्वरुप कानुनमन्त्री नायकले आफ्नो पूर्व निर्धारित पोखरा भ्रमण स्थगित गर्नुभएको छ ।
