काठमाडौ २५ पौष ।
नेकपा एमाले सुनसरीले आज हरिनगरमा आयोजना गरेको आमसभामा मधेशी मोर्चाले अवरोध गरेको छ । मोर्चाको अवरोधका बिच एमालेले आमसभा गरेपछि तनाव उत्पन्न भएको हो ।
पार्टी बरिष्ठ नेता माधव नेपालले सम्बोधन गर्ने आमसभा आसपास मधेसी मोर्चाका कार्याकर्ताहरुले प्रदर्शन गरेपछि तनाव उत्पन्न भएको सुनसरी प्रहरीले जनाएको छ ।
एमालेले आमसभा गर्ने तयारी थालेदेखि नै मोर्चाका कार्याकर्ताहरुले कुनै पनि हालतमा कार्यक्रम गर्न नदिने भन्दै विरोध जनाएका थिए ।
विरोध स्वरुप मोर्चाले आज बिहानैदेखि हरिनगर बजार बन्द गरेका थिए । सो क्रममा मोर्चाका कार्यकर्ताहरुले हरिनगरमा एक यात्रु बाहक बसमा तोडफोड र आगजनी गरेका छन् ।
बसमा लगाएको आगो सुरक्षाकर्मीले तत्काल निभाएकाले धेरै क्षति भने नभएको सुनसरीका प्रहरी उपरीक्षक पोषराज पोखरेलले जानकारी दिनुभयो ।
त्यस्तै प्रहरीले आन्दोलनकारीको साथबाट ५ बोतल पेट्रोल बम समेत बरामद गरेको छ भने आगजनी गर्न खोज्ने एक जनालाई नियन्त्रणमा लिएको छ ।
