काठमाडौं ,पुस २४ ।
एमाले सहित विपक्षी ९ दलको विरोधकाबीच सरकारले संविधान संशोधन विधेयक संसदमा पेस गरेको छ ।
नयाँ बानेश्वर स्थित संसद भवनमा अपरान्ह बसेको संसदको दोस्रो बैठकमा उपप्रधान तथा गृहमन्त्री विमलेन्द्र निधिको तर्फबाट कानुनमन्त्री अजय शंकर नायकले संशोधन विधेयक पेस गर्नुभयो ।
विपक्षी ९ दलहरुको नाराबाजी र होहल्लाका बीच नमन्त्री नायकले संशोधन विधेयक पेस गर्नुभएको हो ।
सभामुख ओनसरी घर्तीले संविधान संशोधन विधेयक पेस गर्न उपप्रधानमन्त्री निधिलाई भनेपछि स्थानीय निर्वाचनसम्बन्धी विधेयक पेस गरेर रोष्टममा नै रहनुभएका कानुनमन्त्री नायकले उहाको तर्फबाट संशोधन विधेयक पेस गर्नुभएको हो ।
यसअघि आज दिउसो १ बजे बसेको पहिलो बैठक पूर्व सांसदको निधनमा शोक प्रस्ताव पारित गर्दै स्थगित भएको थियो ।
यसैबीच, आफूहरुको विरोधका बाबजुद संसदमा संशोधन प्रस्ताव प्रस्तुत हुनुलाई विपक्षीले ‘लज्जास्पद घटना’ भएको प्रतिक्रिया दिएका छन् ।
संसद भवनबाट बाहिरिनुभएका एमाले उपाध्यक्ष वामदेव गौतमले संसारमै नभएको संसदीय अभ्यासविपरीत सभामुख अघि बढेको बताउनु भयो ।
उहाँले संशोधन विधेयक प्रस्तुत गर्न अनुमति दिनु लज्जास्पद घटना भएको भन्दै आफूहरुले विरोधलाई निरन्तरता दिने पनि बताउनु भयो ।
विधेयक पेस गर्न अनुमति दिनुभएको हो भन्ने सञ्चारकर्मीको जिज्ञासामा गौतमले ‘टेबुल गर्ने विषयमा कुनै सहमती नभएको बताउनु भयो ।
संसदको गतिरोध अन्त्यको लागि संसद बैठकअघि बसेको प्रमुख तीन दलका शीर्ष नेता बैठक बिना निष्कर्ष सकिएको थियो ।
