काठमाण्डौ ,२७ मंसिर ।
चर्चित अभिनेत्री रेखा थापा राष्ट्रिय प्रजातन्त्र पार्टी (राप्रपा)मा प्रवेश गरेकी छन् । सोमबार बिहान काठमाडौंको इन्द्रेणी फुडल्याण्डमा आयोजित कार्यक्रममा पार्टी अध्यक्ष थापाले टीका लगाएर अभिनेत्री रेखा र उनकी आमालाई पार्टी प्रवेश गराएका हुन् ।
उनीसँगै उनकी आमा सरस्वती थापा पनि राप्रपा प्रवेश गरेकी हुन् । पार्टी प्रवेशसँगै कमल थापाले दुवैलाई स्वागत गरेका थिए । यसपछि, पार्टीका अन्य सदस्यहरुले रेखालाई माला लगाइदिएका थिए ।
रेखा २०७० साल जेठ ४ गते एमाले नेतृ उर्मिला अर्यालसहित प्रचण्डको हातबाट टिका लगाएर तत्कालिन एमाओवादी (हालः माओवादी केन्द्र) मा प्रवेश गरेकी थिइन् ।
तर उनले आज राप्रपामा प्रवेश गर्दै भनिन् , यसअघि मैले माओवादी पार्टीको सदस्यता नलिएको पष्ट पार्न चाहन्छु ।
पार्टी प्रवेश कार्यक्रममा बोल्दै नायिका रेखाले आफू हिन्दु नारी भएकाले गर्दा राप्रपा नै आफ्ना लागि उपयुक्त पार्टी भएको बताइन् । उनले नेपाल र राप्रपाको झण्डा ओडेर आफूले मर्न चाहेको बताइन् । उनले भनिन् हिजोका दिनमा म जनलहर चलेका बेला अरु पार्टिमा गए तर यो नै मेरो विचारसँग सहमत पार्टी हो, ‘मेरो पहिलो र अन्तिम पार्टी नै राप्रपा हुनेछ ।
रेखाले जनलहर चलेका बेलामा कलाकार भएको हिसाबले आफू जनलहरसँगै, जनताको खुशीका निमित्त देशलाई केही हुन्छ भन्नका लागि माओवादीमा गएको र त्यबाट आफुलाई टिक प्राप्त भएपनि नलिएको जनाईन् ।
राष्ट्र र राष्ट्रियताका लागि आफूले सम्झौता नगर्ने भन्दै उनले आफुले पार्टी सदस्यता लिएर राप्रपा प्रवेश गरेको बताईन् । उनले आफूले राजनीति बुझेदेखि नेता मध्ये कमल थापा मनपरेको र सधैं रहिरहने बताइन् ।
