सिन्धुपाल्चोक, १८ मंसिर ।
मेलम्ची खानेपानी आयोजनाको हेडवक्र्स स्थान अम्बाथानमा पहाड खन्दा ढुंगामा मिसिएको पहेँलो पदार्थ फेला परपछि सुन हुन सक्ने आशंकामा निर्माण कार्य नै रोकिएको छ ।
हेडवक्र्सको काममा रहेका इटालियनले पहेँलो कण मिसिएको ढुंगालाई लुकाएर धमाधम झोलामा राख्न थालेपछि स्थानीयले सो पदार्थ सुन रहेको भन्दै निर्माण कार्य अबरोध गरेका थिए ।
उनीहरुले इटालियन कामदारले पहेँलो रंगका ढुंगा झोलामा हालेपछि स्थानीयले सुन भेटिएको हल्ला चलाएर काम नै रोक्न बाध्य बनाए ।
सुन भएको पहाड खन्न पाइँदैन भन्दै अम्बाथानवासी हेडवक्र्स स्थानमा पुगेपछि खानेपानीको हेडवक्र्स साइटको काम रोकिएको छ । त्यस्तो पहेँलो पदार्थ अम्बाथानवरिपरि धेरै ठाउँमा पाइने गरेको स्थानीयले बताएका छन् ।
सुनजस्तै पहेँलो पदार्थ फेलापरेपछि हेडवक्र्सको पहाड खन्ने काम हिजोदेखि बन्द भएको मेलम्ची खानेपानी बोर्डका इन्जिनियर लक्ष्मण रायमाझीले जानकारी दिनुभयो ।
स्थानीयको एक समूहले सुनको पहाड नखन्न भनेपछि खानेपानी आयोजनाले सो स्थानमा काम बन्द गरेको उहाले बताउनु भयो । पहेँलो पदार्थ मिश्रित ढुंगा परीक्षणका लागि काठमाडौं ल्याइसकेको र ढुंगाको स्याम्पल खानी तथा भूगर्भ विभागमा पठाउन लागेको बताउनु भयो । सुन हो वा अन्य धातु हो भन्ने पत्ता लाग्न आइतबारसम्म पत्ता लाग्ने छ ।
हेडवक्र्स साइटमा सुरक्षा व्यवस्था कडा पारिएको मेलम्ची खानेपानी आयोजनाको सुरक्षा विभाग हेरिरहेका भूपू डिएसपी होमजंग चौहानले बताउनु भयो ।
