काठमाडौं, १२ मंसिर ।
काठमाडौ उपत्यकामा आजदेखि साझा यातायातका सुविधा सम्पन्न थप ३० वटा बस सञ्चालनमा आएको छ । उपत्यकाका विभिन्न चार रुटमा अब पुराना आठ सहित नयाँ ३० गरी ३८ वटा बस सञ्चालन हुने साझा यातायातले जनाएको छ ।
अपाङ्गमैत्री साझाको नयाँ बसको प्रधानमन्त्री पुष्पकमल दाहालले आज बिहान उद्घाटन गर्नुभएको छ । प्रधानमन्त्री दाहाल पुलचोकस्थित साझा यातायातको कार्यलयबाट साझा बस चढेर सिंहदरबारस्थित आफ्नो कार्यलयमा आउनु भएको छ ।
शहरी मापदण्डका अत्याधुनिक सुविधा सम्पन्न ठूला गाडी मार्फत काठमाडौं उपत्यकाका चारवटा रुटमा यात्रुले सेवा पाउने साझा यातायातका कायम मुकायम प्रमुख कार्यकारी निर्देशक महेन्द्रराज पाण्डेले जानकारी दिनुभयो ।
साझाको नयाँ वसमा दुई वटा ह्विलचेयर अट्ने ठाउँ, चारवटा सिसिटिभी, मनोरञ्जनका लागि एलइडी टिभी, मोवाइल चार्जरको व्यवस्था गरिएको छ ।
शहरी सवारी मापदण्ड र यात्रुको सेवालाई मध्यनजर गरी साझाले विशेष सुविधायुक्त बस सञ्चालनमा ल्याएको हो । साझाको उपत्यका भित्र र बाहिर गरी नयाँ थपिएका बस सहित जम्मा ४६ वटा बस सञ्चालनमा रहेका छन् ।
