पाँचथर, मंसिर ७ । पाँचथरमा बर्डफ्लुको संक्रमण फैलन नदिन सतर्कता अपनाइने भएको छ । जिल्ला प्रशासन कार्यालय पाँचथरमा सरोकारवालाहरुबीच भएको छलफलले सतर्कता अपनाउने निर्णय गरेको हो ।
अब भेटनरिको प्रमाणपत्र विना चल्ला, कुखुरा, अण्डा, दाना लगायत कुखुरामा प्रयोग गरिने सामग्रीहरु आन्तरिक ओसार–पसार गर्न रोक लगाइने भएको छ । जिल्लामा सञ्चालित कुखुरा फार्मको जिल्ला पशु सेवा कार्यालयले नियमित अनुगमन गर्ने, अनुगमनका क्रममा कुखुरा फार्म सम्बन्धित निकायमा दर्ता नभएको भए १५ दिनभित्र दर्ता गर्न लगाउने निर्णय भएको बताइएको छ ।
बर्डफुलु रोग नियन्त्रण सम्बन्धी सूचना स्थानीय एफएमहरुबाट प्रशारण गर्ने, रोगबाट कुखुराको मृत्यु भएमा प्रक्रिया पूरा गरेको खण्डमा मात्रै क्षतिपूर्ति दिने निर्णय समेत बैठकले गरेको छ । दुई वर्षअघि पाँचथरको फाक्तेपमा बर्डफ्लुको संक्रमण फैलिएर ठूलो क्षति भएको थियो ।
