काठमाण्डौ ,३ मंसिर ।
आईओएमको डिन नियुक्ति प्रति असहमती जनाउदै दशौ पटक अनसन बस्नुभएका प्राध्यापक डाक्टर गोविन्द केसीको स्वास्थ्यमा समस्या देखिन थालेको छ ।
अनशनको छैठौ दिन आज उहाँको शरीरमा ग्लूकोजको मात्रामा कमी र मुटुको चाल घटबढ हुने समस्या देखिएको उपचारमा संलग्न चिकित्सकले बताएका छन् ।
चिकित्सा शिक्षा र सेवा सुधारको माग राख्दै आउनु भएका केसीले पछिल्लो पटक त्रिभुवन विश्वविद्यालय चिकित्साशास्त्र अध्ययन संस्थान आईओएमको डिनमा केशव प्रसाद सिंह नियुक्त प्रति असहमती जनाउदै अनशन शुरु गर्नुभएको हो । उहाले आईओएमको डिनमा नियुक्त सिंहलाई राजिनामा दिन पनि आग्रह गर्नुभएको छ ।
केसीले वरिष्ठताका आधारमा प्राध्यापक जगदिश प्रसाद अग्रवाललाई आईओएमको डिन नियुक्त गर्नुपर्ने ,चिकित्सा शिक्षा अन्तर्गत एमवीवीएस र बीडीएस कार्यक्रमको शुल्क अघिल्लो वर्ष तोकिए बमोजिम लिन विश्वविद्यालयहरुलाई निर्देशन दिनुपर्ने तथा विगतका सहमति कार्यान्वयन गर्नुपर्ने माग राख्नुभएको छ ।
यसैबीच, केसीको अनसनप्रति ऐक्यबद्धता जनाउदै शिक्षण अस्पताल महाराजगंजमा अध्ययनरत आवाशीय चिकित्सले आगामी आईतबारबाट नियमित कक्षा बहिष्कार गर्ने भएका छन् ।
नेशनल रेजिडेन्ट डक्टर्स एशोसिएशनले बिज्ञप्ती जारी गरी अनसनलाई छिटो भन्दा छिटो निश्कर्षमा पुर्याउन सम्बन्धीत निकायको ध्यानाकर्षणका लागि बिरोधमा उत्रिनु परेको जनाएको छ ।
साथै भोली बिहान साढे १० बजे अस्पताल परिसरबाट प्रधानमन्त्रीको सरकारी निवाससम्म र्यालीको समेत आयोजना गरेको एशोसिएशनका अध्यक्ष लिजन महर्जनले जानकारी दिनुभयो ।
