काठमाडौं,कार्तिक २५ ।
पीन र पासवर्ड चोरेर नबिल बैंको कान्तिपथस्थित एटीएमबाट पैसा झिक्ने दुई जना टर्किस नागरिकलाई प्रहरीले आज पक्राउ गरेको छ ।
केन्द्रीय अनुसन्धान व्यूरोको टोलीले २६ लाख ७५ हजार नेपाली रुपैयाँ, १७ सय यूरो, १६६० अमेरिकी डलर सहित मुहरम अजन र सल्लहटिन यवर नाम गरेका दुई ब्यात्तिलाई नियन्त्रणमा लिएको हो ।
उनीहरुको साथबाट विभिन्न बैंकको १ सय १३ वटा एटीएम पनि बरामद गरिएको व्यूरोका प्रबक्ता एसपी दिवस लोहनीले बताउनु भयो ।
सन् २०१६ को मे २६ देखि नोभेम्वर ७ सम्ममा तीन पटक नेपालको भ्रमण गरेको उनीहरु कान्तिपथस्थित एलो पकोडा होटलमा बस्दै आएको अनुसन्धानबाट खुलेको उहाले बताउनु भयो ।
उनीहरु यही नोभेम्वर १२ मा टर्कि फर्कने तयारी रहेको पनि खुलेको छ ।
उनीहरुले आफ्नै देशबाट नेपाली तीन सय जना ग्राहकको एटीएमको पीन नम्बर र पासवर्ड लिएर आएकोले यसअघि पक्राउ परेकाहरुकै सहयोगी हुन सक्ने प्रहरीको आशंका छ ।
यसअघि काठमाडौंमै एटीएमको पीन र पासवर्ड चोरी गरेर रकम झिकेको पाइएपछि दुई जना टर्किस, कतिक १९ गते रोमानियन, ११ गते एक जना बुल्गेरियन र साउन १७ गते एक रोमानियन पक्राउ परेका छन् ।
