दैलेख, ३० असोज ।
सरकार परिवर्तनसँगै सम्भावित ग्यास खानीको अन्वेषण तथा उत्खनन् कार्य अलपत्र परेको छ ।
केपी ओली नेतृत्वको सरकारले सुरु गरेको दैलेखको शिरस्थान–नाभिस्थान क्षेत्रमा ग्यास अन्वेषण कार्य सरकार परिवर्तनसँगै अलपत्र परेको हो ।
अघिल्ला सरकारले अगाडि बढाएका राम्रा कार्यक्रम निरन्तरता पाउने आशामा रहेका दैलेखबासी अन्ततः आफ्नै क्ष्ोत्रमा रहेको ग्यास खानीकै अनुसन्धान प्रक्रिया रोकिएपछि निराश छन् ।
भारतीय नाकाबन्दी र मधेस आन्दोलनका कारण लामो समय इन्धन संकट भोग्नुपरेपछि तत्कालिन सरकारले मुलुकभित्रका खानीहरुको पहिचान, अन्वेषण र उत्खनन् कार्य अगाडि बढाउन तत्परता देखाएको थियो ।
चिनियाँ विशेषज्ञसहित त्यहाँ गएका ओली सरकारका उद्योगमन्त्री सोमप्रसाद पाण्डेले विस्तृत अनुसन्धान पश्चात् उत्खनन् प्रक्रिया अघि बढाउने प्रतिवद्धता जनाउनुभएको थियो ।उहाँ दुईपटक खानी क्षेत्रमा पुग्नुभएको थियो ।
चिनियाँ विशेषज्ञको एक टोली एक साता खानी क्षेत्रमा ग्यास अध्ययन गरी फर्केको थियो ।
