पर्सा, असोज १० ।
वीरगन्जको सुक्खा बन्दरगाह भन्सार कार्यालयले चालु आवको दुई महिनामा रु ३ अर्ब ५९ करोडभन्दा बढी रुपैयाँ राजस्व संकलन गरेको छ ।
भन्सार विभागले आव २०७३ ÷७४को साउन र भदौ महिनामा सो कार्यालयबाट लक्ष्यभन्दा रु १८ करोड १७ लाख ७२ हजार बढी राजश्व संकलन गरेको हो ।
३ अर्ब ४१ करोड २९ लाख ३३ हजार राजस्व संकलन हुने अनुमान गरेकामा संकलित राजस्व लक्ष्यको तुलनामा १०५.३२ प्रतिशत बढी अर्थात् रु ३ अर्ब ५९ करोड ४७ लाख पाँच हजार राजस्व संकलन गर्न सफल भएको सुक्खा बन्दरगाह भन्सार कार्यालयले जनाएको छ ।
विभागले साउन महिनाका लागि रु १ अर्ब ५१ करोड ३ लाख ४१ हजार राजस्व संकलन हुने अनुमान गरेकामा कार्यालयले लक्ष्यभन्दा रु १० करोड ३५ लाख ६० हजार अर्थात् रु १ अर्ब ६१ करोड ३९ लाख १ हजार संकलन गर्न सफल भएको कार्यालयका प्रमुख देवीप्रसाद भण्डारीले जानकारी दिए ।
यस्तै, भदौ महिनामा रु १ अर्ब ९० करोड २५ लाख ९२ हजार राजस्व संकलन हुने अनुमानमा रु १ अर्ब ९८ करोड ८ लाख ४ हजार अर्थात् लक्ष्यको तुलनामा रु ७ करोड ८२ लाख २ हजार बढी राजस्व संकलन गरेको छ ।
भारतको कोलकाता बन्दरगाहबाट रेलमार्फत् नेपालका लागि औद्योगिक कच्चापदार्थ तथा खाद्यान्न आयातमा बृद्धि भएकाले सुक्खा बन्दरगाह भन्सारको राजस्व संकलन सन्तोषजनक भएको भन्सार प्रमुख भण्डारीको भनाइ छ ।
