काठमाडौं, ४ असोज ।
संसदको सामाजिक न्याय तथा मानवअधिकार समितिले तत्कालीन क्यासिनो नेपाल र नेपाल रिक्रिएसन सेन्टरका फरार सन्चालक राकेश वाद्वालाई पक्राउ गर्न सरकारलाई निर्देशन दिएको छ ।
समितिको आज बसेको बैठकले क्यासिनो बन्द हुदा त्यहा कार्यरत मजदुरको विचल्ली भएको निश्कर्ष निकाल्दै सन्चालक वाद्धालाई पक्राउ गरि समस्या समाधान गर्न निर्देशन दिएको हो ।
आर डी टटल र राकेश वाद्वाबीचको विवादका कारण होटल सोल्टीको प्रांगणमा रहेको सो क्यासिनो वि.सं. २०६९ साउन महिनादेखि बन्द हुदा करिब एक हजार ६८ मजदुर बिचल्लीमा परेका छन् ।
ती मजदुरले दिएको निवेदनको आधारमा गठित उपसमितिले प्रतिवेदन मार्फत पर्यटन मन्त्रालयलाई समस्या समाधानका लागि पहल गर्न आग्रह गरेपनि समस्या समाधान नभएको भन्दै समितिले तत्काल काम अघि बढाउन भनेको छ ।
आजको बैठकमा सोहि प्रतिवेदनका आधारमा क्यासिनो नेपाल र नेपाल रिक्रिएसन सेन्टरका पूर्वकर्मचारीका उजुरीका विषयमा संस्कृति, पर्यटन तथा नागरिक उडड्यन मन्त्रालय, होटल सोल्टी, गृह मन्त्रालय र नेपाल प्रहरीलाई समेत छलफलका लागि बोलाएको छ ।
बैठकमा बोल्दै समिति सदस्य अष्टलक्ष्मी शाक्य , कमला दोङ, उषा यादव र कमलाकुमारी घिमिरेले ‘क्यासिनो बन्द हुँदा मजदुरले रोजीरोटी गुमाउनु परेको हुँदा सरकारले तुरुन्त समस्याको समाधान निकाल्नुपर्नेमा जोड दिएका थिए । समितिको अर्काे बैठक असोज ९ गते बिहान ८ बजे बस्नेछ ।
