काठमाडौं, साउन २७।
नेपाल विद्युत प्राधिकरणले लोडसेडिङको समय घटाएको छ । आज देखि लागु हुने गरी प्राधिकरणले लोडसेडिङको नयाँ तालिका सार्वजनिक गरेको हो ।
नयाँ तालिका अनुसार अब हप्तामा साढे ४८ घण्टा लोडसेडिङ हुनेछ । यसअघि हप्तामा ६३ घण्टा लोडसेडिङ हुँदै आएको थियो ।
अबदेखि एक दिन ६ घण्टा, तीन दिन साढे ६ घण्टा, दुई दिन ८ घण्टा र एक दिन ७ घण्टा लोडसेडिङ हुनेछ । प्राधिकरणले परिस्थिति प्रतिकुल र अनुकुल भएका एक घण्टा लोडसेडिङ थपघट हुन सक्ने जनाएको छ ।
यस्तै बेलुकाको समयमा विद्युत खपत बढी हुने उपकरण सकेसम्म बन्द गरी लोडसेडिङ न्युनिकरणमा सहयोग गर्न पनि प्राधिकरणले सबैसँग आग्रह गरेको छ ।
यसै विच ऊर्जा मन्त्रालयले लोडसेडिङ घटाउने सम्बन्धि तयार पारेको पाँच बुदे कार्ययोजना आज प्रधानमन्त्री पुष्पकमल दाहाललाई बुझाउने तयारी गरेको छ ।
प्रधानमन्त्री दाहालले सबै मन्त्रालयलाई योजना ल्याउन निर्देशन दिएपछि ऊर्जाले पाँच बुँदामा आगामी हिउद देखि लोडसेडिङ दैनिक सात घण्टामा झार्ने गरीे कार्ययोजना तयार गरेको हो ।
ऊर्जा सचिव सुमनप्रसाद शर्माले लोडसेडिङ न्यूनीकरणलाई प्राथमिकता दिएर कार्ययोजना निर्माण गरिएको जानकारी दिए ।
