भक्तपुर, ३ साउन ।
भक्तपुरमा आज देखि भूकम्पपीडितको लगत सङ्कलन एवम् पुनःसर्वेक्षण कार्य सुरु भएको छ ।
भूकम्प प्रभावित आवास पुनःनिर्माणको लगत सङ्कलन कार्यक्रमका लागि सर्वेक्षणमा सहभागी कर्मचारीलाई आजबाट घरघरमा खटाइएको छ ।
पुनःनिर्माण प्राधिकरणले भूकम्पबाट प्रभावित उपत्यका बाहिरका ११ जिल्लाका भूकम्पपीडितको पुनःसर्वेक्षण कार्य सम्पन्न गरिसके पनि उपत्यकाका तीन जिल्ला भक्तपुर, काठमाडौँ र ललितपुरमा भने आजदेखि सुरु भएको हो ।
लगत सर्वेक्षणका लागि सहभागी कर्मचारीलाई हिजो र अस्ती दुईदिन तालिम दिइएको जिल्ला लगत सङ्कलन व्यवस्थानपन कार्यालय भक्तपुरका निर्देशक धु्रवरत्न बज्रचार्यले जानकारी दिनुभयो ।
लगत सर्वेक्षणका लागि तथ्याङ्क विभागका इन्जिनियर एवम् सुपरभाइजर १२१ जना, सामाजिक परिचालक १२१ जना र प्रति १० जना सामाजिक परिचालक बराबर एक जनाका दरले सिनियर इन्जिनियर परिचालन गरिने बज्रचायले बताउनु भयो ।
आगामी ४५ दिनसम्म सञ्चालन हुने लगत सङ्कलन एवम् पुनःसर्वेक्षण कार्यमा भूकम्प पछि गरिएको लगत सङ्कलन एवम् सर्वेक्षणमा छुटेका भूकम्पपीडितलाई समेत समावेश गरिने तयारी गरिएको छ ।
