काठमाडौ १० असार ।
व्यवस्थापिका संसदको बैठक आजपनि बस्दैछ । नयाँ बानेश्वरस्थित संसद भवन बिहान ११ बजेपछि सुरु हुने बैठकमा आजपनि विनियोजन विधेयकमाथि छलफल गर्ने कार्यसुची रहेको छ ।
बैठकमा सुचना तथा सन्चार, युवा तथा खेलकुद, स्वास्थ्य, भूमिसुधार, कृषि, उद्योग र कानुन न्याय तथा संसदीय मामिला लगायत सात ओटा मन्त्रालयका लागि विनियोजित रकममाथि सांसदहरुले धारणा राख्ने क्रम जारी रहने संसद सचिवालयले जनाएको छ ।
यसअघि हिजोको बैठकमा पनि मन्त्रालयगत विनियोजित रकमबारे छलफल गर्ने कार्यसुची रहेपनि प्रतिपक्षी दल नेपाली कांग्रेसको अवरोधका कारण बैठक कार्यसुचीमा प्रवेश गर्न सकेन ।
कांग्रेसले भूकम्प पीडितलाई दिने भनिएको प्रतिपरिवार २ लाख रुपैयाँ राहत तत्काल एकमुष्ठ दिन माग गर्दै सदन अवरोध गरेपछि बैठक प्रभावित बनेको हो ।
यस विषयमा आफूहरुले सदनमा आवाज उठाएको नौ दिन बितिसक्दा पनि सरकार गम्भिर नदेखेको भन्दै सरकारको ठोस जवाफ नआएसम्म सदन चल्न नदिने कांग्रेसको अडान छ ।
