काठमाण्डौ , ८ असार ।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को आज हुने भनिएको आफ्नो अष्ट्रेलिया भ्रमण स्थगित गर्नुभएको छ ।
देशको वर्तमान राजनीतिक सन्दर्भ र पार्टी कामको चापका कारण भ्रमण स्थगित गरिएको प्रचण्डको सचिवालयले जनाएको छ ।
माओवादी अध्यक्ष प्रचण्ड बुधबार मध्यान्ह १२ बजे अष्ट्रेलिया भ्रमणमा जाने कार्यक्रम थियो । अष्ट्रेलिया जानुभन्दा केहि घण्टा अघि मात्रै प्रचण्डले भ्रमण स्थगित गरेका हुन् ।
प्रधानमन्त्री केपी शर्मा ओली र काग्रेस सभापति शेरबहादुर देउवासँगको भेट लगत्तै उहाले भ्रमण स्थगित गर्नुभएको हो । प्रधानमन्त्रीले अहिले भ्रमणमा जानु त्यति उपयुत्त नहुने सझाव दिएपछि भ्रमण स्थगित गरिएको बताईएको छ ।
नेकपा माओवादी केन्द्रको भातृ संगठन नेपाली जनप्रगतीशिल मञ्चको तेस्रो अधिवेशनको कार्यक्रममा सहभागी हुन उनी आठ दिन लामो अस्ट्रेलिया भ्रमणमा जाने कार्यक्रम थियो ।
अब प्रचण्डको अनुपस्थितिमा विदेश विभाग सदस्य युवराज चौलागाईं अष्ट्रेलियाको कार्यक्रममा सहभागी हुनेछन् ।
