काठमाण्डौ, असार ५।
व्यवस्थापिका संसदको आजको बैठकले बहुप्रतिक्षित ’व्यवस्थापिका संसद कार्यसञ्चालन नियमावली’ बहुमतले पारित भएको छ ।
आज बसेको बैठकमा नियमावली मस्यौदा समितिका सभापति राधेश्याम अधिकारीले मस्यौदा प्रतिवेदन माथिको दफावार छलफल सदनमा गरियोस् भनेर प्रस्ताव राखेका थिए । सोही अनुसार बैठकले मस्यौदा छलफल पछि पारित गरेको छ ।
बैठकले संसदीय सुनुवाई समिति १५ सदस्यीय हुने व्यवस्था समेत गरेको छ । यसअघि समिति ७५ सदस्यीय हुने या १५ सदस्यीय हुने भन्नेमा सत्ता नेतृत्वकर्ता नेकपा एमाले र प्रमुख प्रतिपक्ष कंग्रेसविच विवाद हुँदै आएको थियो । बैठकमा कानुनन्याय तथा संसदीय विकास मन्त्री अग्नी खरेलले ‘संविधान कार्यन्वयन कार्ययोजना’ संसदमा पेश गरेका छन् ।
उक्त कार्ययोजनामा भाषा आयोग गठन गर्नेदेखि प्रदेश प्रमुखको नियुक्ती र प्रदेशको कार्य संचालन सम्बन्धी अन्य व्यवस्था बारे उल्लेख गरिएको छ । कार्ययोजनालाई केही दिन अगाडी मन्त्रीपरिषद्ले पास गरेको थियो ।
यसैविच संघीय गणतान्त्रिक मोर्चाले आजको संसद बैठक पनि बहिष्कार गरेको छ ।
आज सभामुख ओनसरी घर्तिमगरले सदनको कारबाही शुरू गर्नासाथ मधेसी मोर्चा लगायतका आन्दोलनरत दलका सांसदले उठेर विरोध जनाएका थिए ।
सरकारले आफूहरुको माग सम्बोधन नगरेसम्म सदनको बैठक बहिष्कार गर्ने भन्दै आज पनि बैठक बहिष्कार गर्दै उनीहरु बाहिरिएका हुन । संसद बैठक भोली बिहान ११ बजे पुनः बस्नेछ ।
