काठमाडौ ३ असार ।
कृषिमन्त्री हरिबोल गजुरेलले सहमतीय सरकारका लागि आफ्नो पार्टी र नेता बाधक नबन्ने बताउनु भएको छ । नेकपा माओवादी केन्द्रका सदस्य समेत रहनु भएका गजुरेलले सहमति बिना सरकार सञ्चालन र संविधान कार्यान्वयनमा अप्ठ्यारो परेको बताउनु भयो ।
प्रेस सेन्टर लमजुङले आज बिहान सदरमुकाम बेसीशहरमा आयोजना गरेको पत्रकार भेटघाटमा बोल्दै उहाँले संविधान कार्यान्वयनको लागि सहमतीय सरकार आवश्यक रहेको त्यसका लागि आफूहरुको बाधक नबन्ने जिकिर गर्नुभयो ।
प्रतिपक्षी दल कांग्रेस पनि सहभागी हुनैपर्ने उहाको भनाई छ । कांग्रेससँग १ तिहाई मत रहेकाले कांग्रेस सहमतिमा नआउँदासम्म जटिलताको अन्त्य नहुने गजुरेलले बताउनु भयो ।
उहाले सरकारको नेतृत्व कस्ले लिने भन्ने विषयमा खुल्ला छलफल गर्न सकिने भन्दै दलहरुबीचको अस्वस्थ्य प्रतिष्पर्धाले संविधान निर्माणको समय भन्दा जटिल परिस्थिति उत्पन्न भएको धारणा राख्नुभयो ।
मन्त्री गजुरेलले कृषिलाई मर्यादित बनाउन आफूले २७ बुँदे कार्यक्रम ल्याएको चर्चा गर्दै पकेट क्षेत्र घोषणा गर्न बजेट बिनियोजन भएको बताउनु भयो ।
उहाँले चालु आर्थिक वर्षदेखि नै कार्यक्रम लागू हुने भएकाले अब खेतहरु बाँझो नरहने दावी समेत गर्नुभएको छ ।
