काठमाडौं, ३१ जेठ ।
व्यवस्थापिका–संसदको वातावरण विकास समितिले विभिन्न स्थानहरुमा रहेका स–साना चिडियाखानाहरु पत्ता लगाइ तथ्यांक संकलन गरी व्यवस्थित र नियमन गर्न सरकारको ध्यानाकर्षण गराएको छ ।
समितिको आज बसेको बैठकले अवैधरुपमा रहेका चिडियाखानाहरुको अनुगमन गरी त्यसको तथ्यांक संकलन गर्ने र चिडियाखानासम्बन्धी नीति र कानुन बनाइ त्यसलाई नियमन गर्नुपर्नेमा जोड दिएको हो ।
बैठकमा सहभागी सांसदहरुले सरकारले स्वीकृति दिएकाबाहेक निजी चिडियाघर राख्न नपाउने कानुन बनाउनुपर्नेमा जोड दिएका थिए ।
बैठकमा ललितपुरस्थित सदर चिडियाखानालाई भक्तपूरको सूर्य्विनायकमा सार्ने विषयमा पनि छलफल भएको थियो ।
वि.सं. १९८९ सालमा तत्कालीन राणा प्रधानमन्त्री जुद्ध शम्शेरले निजीरुपमा स्थापना गरेको ललितपुरको जाउलाखेलस्थित सदर चिडियाखाना २०११ सालदेखिमात्र सर्वसाधारणका लागि खुला गरिएको थियो ।
