काठमाण्डौ , ३१ जेठ ।
नयाँ संविधानमा असन्तुष्टि जनाउँदै झन्डै एक वर्षदेखि आन्दोलनरत मधेसी दलहरुसहितका समूहलाई सरकारले वार्ताका लागि आज पत्र पठाएको छ ।
प्रधानमन्त्री केपी शर्मा ओलीले संयुक्त लोकतान्त्रिक मधेसी मोर्चासम्बवद्ध दलहरु तथा थरुहट र मुस्लिम मोर्चालाई पनि वार्ताका लागि पत्र पठाउनुभएको हो ।
आइतबार भएको नयाँ शक्ति पार्टी घोषणा कार्यक्रममा मन्तब्य दिँदै मधेसी दललाई वार्तामा बोलाउने बताएकै भोलिपल्ट ओलीले उनीहरुलाई वार्ताका लागि बोलाउनुभयो ।
‘प्रधानमन्त्री केपी शर्मा ओलीले वार्तामा बस्नका लागि आज पत्र पठाउनु भएको छ’, प्रधानमन्त्रीका प्रेस सल्लाहकार प्रमोद दाहालले भन्नुभयो । ‘सरकारबाट पठाइएको पत्र सबै दलले बुझिसकेका छन् । उताबाट वार्ताका लागि सकारात्मक भएको खबर आएको छ ।’
सरकारले आन्दोलनरत थरुहट–थारुवानलाई दुई दिनअघि नै वार्तामा बस्न पत्र पठाइसकेको थियो । मुस्लिम मोर्चालाई पनि सरकारले आइतबार पत्रप पठाइसकेको छ ।
प्रधानमन्त्री कार्यालय स्रोतका अनुसार एउटा पत्र संयुक्त लोकतान्त्रिक मधेसी मोर्चाको नाममा पठाइएको छ भने आन्दोलनरत मधेसी दलका अध्यक्षलाई पनि सम्बोधन गरेर अलग अलग पत्र पनि पठाइएको जनाईएको छ ।
