काठमाडौ २८ जेठ ।
उपप्रधान तथा परराष्ट्रमन्त्री कमल थापा आज भारत भ्रमणमा जाँदै हुनुहुन्छ ।
दक्षिण एसियाली विश्वविद्यालय नयाँ दिल्लीमा भोली हुने दिक्षान्त समारोहमा सहभागी हुन उपप्रधानमन्त्री थापा त्यसतर्फ प्रस्थान गर्न लाग्नु भएको हो ।
भारत भ्रमणका क्रममा उहाँले भारतीय समकक्षी शुष्मा स्वराजसँग भेटवार्ता गर्नुहुनेछ । आज साँझ दिल्लीमा हुने भेटमा नेपाल–भारत संयुक्त आयोगको नयाँ बैठकको मिति तय गर्ने विषयमा छलफल हुने बताइएको छ ।
उपप्रधानमन्त्री थापाले भारतीय प्रधानमन्त्री नरेन्द्र मोदी, प्रमुख प्रतिपक्षी दलका कांग्रेस आइकी अध्यक्ष सोनिया गान्धीसँग भेट्ने सम्भावना रहेको परराष्ट्र मन्त्रालय स्रोतले जनाएको छ ।
यस्तै उहाँ दिल्लीस्थित अब्जर्भर रिसर्च फाउन्डेसनले नेपालको संविधान निर्माणपछिको अवस्थाबारे गर्ने अन्तरक्रिया कार्यक्रममा पनि सहभागी हुने कार्यक्रम रहेको छ ।
यसअघि भारतले लगाएको पाँच महिने नाकाबन्दीकै बीचमा पनि मन्त्री थापा तीनपटक भारत भ्रमणमा जानु भएको थियो ।
