काठमाडौं, जेठ २०
आगामी महिनादेखि सरकारले यो वर्ष ३५ जिल्लामा राष्ट्रिय प्रारम्भिक कक्षा पढाई कार्यक्रम बिस्तार गर्ने भएको छ । ७५ वटै जिल्लामा कक्षा १ देखि ३ सम्मका बालबालिकाको पढाईको सीप सुधार गर्न कार्यक्रम सञ्चालन गर्न लागिएको हो ।
सन् २०१४ मा सुरु भएको यो कार्यक्रमको पहिलो चरणमा १६ वटा र दोस्रो चरणमा २४ वटा जिल्लामा कार्यक्रम सञ्चालन भैसकेको छ । यो तेस्रो चरण अन्तर्गतको कार्यक्रम हो । पाँच वर्षका लागि कार्यान्वयन भएको यो कार्यक्रम सन् २०१९ मा सकिने छ ।
आगामी एक वर्षमा १५ हजार एक सय १४ विद्यालयका कक्षा १ र २ मा पढ्दै गरेका १० लाख बालबालिका यो कार्यक्रममा समावेश हुनेछन् ।
कार्यक्रम अन्तर्गत शिक्षकलाई तालिम दिने, विद्यालयलाई थप पाठयपुस्तक र सन्दर्भ सामग्री वितरण गरिने, बालबालिकालाई पठन सीपको विकास गरी शैक्षिक गुणस्तर बढाउने लगायत छन् ।
