काठमाडौं, ५ जेठ ।
संविधान पुनर्लेखनको माग गर्दै संघीय गठबन्धनले सुरु गरेको काठमाण्डौ केन्द्रित आन्दोलन थप दश दिन लम्बिएको छ ।
संघीय समाजवादी फोरम नेपालको केन्द्रीय कार्यालय तीनकुनेमा बसेको गठबन्धनको बैठकले काठमाडौं केन्द्रित आन्दोलन थप १० दिन गर्ने निर्णय गरेको गठबन्धनका प्रवत्ता पर्शुराम तामाले जानकारी दिनुभयो ।
प्रत्येक दिन बैठक बसि कार्यक्रमको स्वरुप र स्थान तय गर्दै आन्दोलनमा उत्रने बैठकले निर्णय गरेको उहाले बताउनु भयो ।
उहाँका अनुसार थप तराई र पहाडमा पनि आन्दोलन थाल्ने बैठकले निर्णय गरेको छ । बैठकको निर्णय काठमाडौंको शान्तिवाटिकाबाट आज सार्वजनिक गर्ने उहाँको भनाई छ ।
मंगलबार प्रधानमन्त्री निवास बालुवाटारमा धर्ना दिएका गठबन्धनका नेता कार्यकर्ताले आज रत्नपार्कमा प्रदर्शन गर्न लागेका हुन् ।
प्रदर्शनपछिको सभामा गठबन्धनका नेताहरुले सम्बोधन गर्ने कार्यक्रम छ ।
