काठमाण्डौ, ३ जेठ ।
नेपाली कांग्रेसका सभापति शेरबहादुर देउवाले सरकार मनपरी ढंगबाट चलिरहेको आरोप लगाउँदै अब कांग्रेसले त्यसको प्रतिरोध गर्ने चेतावनी दिनुभएको छ ।
प्रजातान्त्रिक बिचार समाजको २२औँ स्थापना दिवसका अवसरमा काठमाडौंमा गरिएको कार्यक्रममा सभापति देउवाले सजग गराउँदा गराउँदै पनि सरकारले एकपछि अर्को गलत निर्णय गर्दै गएको आरोप लगाउनुभयो ।
कांग्रेस अब चूप बस्दैन भन्दै देउवाले सय वर्षमा सात सय मेघावाट विद्युत उत्पादन गर्न नसकिएको अवस्थामा हावादारी कुरा गरेर सरकार जनतामा भ्रम छरिरहेको समेत बताउनुभयो ।
कांग्रेसलाई एकापसमा जुधाएर फाईदा उठाउनेहरु सक्रिय हुन थालेको भन्दै प्रजातन्त्रप्रति प्रतिबद्धहरुबीच एकताको खाँचो रहेको औल्याउनुभयो ।
त्यस्तै कांग्रेस नेता अर्जुननरसिंह केसीले सरकार स्वतन्त्र न्यायालयलगायतका अंगमा हस्तक्षेपमा उत्रिएको भन्दै कांग्रेसले जिम्मेवार प्रतिपक्षको भूमिका निर्वाह गर्नुपर्ने बेला आएकोमा जोड दिनुभयो ।
कार्यक्रममा नेपाल बार एशोशियशनका अध्यक्ष शेरबहादुर केसी, प्रजातान्त्रिक बिचार समाजका अध्यक्ष डा. केदारनरसिंह केसीलगायतले प्रजातान्त्रिक बिचार समाजले प्रजातन्त्र र लोकतन्त्रको रक्षाका लागि काम गरिरहेको उल्लेख गर्नुभयो ।
कार्यक्रममा किशुनजी नामक विशेष पुस्तिकाको विमोचन पनि गरिएको थियो ।
