काठमाडौ २ जेठ ।
संसद सन्चाल सम्बन्धी नियमावली निर्माणमा देखिएको विवाद समाधानको पहल स्वरुप प्रमुख दलका शिर्षस्थ नेताहरुको बैठक आज पनि बस्दैछ ।
यसअघि हिजोको बैठकमा बिना निष्कर्ष टुङ्गिएपछि दलहरु आज पुनः छलफलमा जुट्न लागेका हुन् । यद्यपी बैठकको समय भने तय भइसकेको छैन ।
प्रधानमन्त्रीको कार्य व्यस्ततालाई मध्यनजर गर्दै बैठक साँझ तिर बोलाउने तयारी भएको एमाले प्रमुख सचेतक भानुभक्त ढकालले जानकारी दिनुभयो ।
कांग्रेस सांसद राधेश्याम अधिकारीको अध्यक्षतामा गठित नियमावली मस्यौदा समितिले विवाद सहितको प्रतिवेदन संसदमा पेश गरेपछि प्रधानमन्त्री ओलीले पहल थाल्नु भएको हो ।
सुनुवाई समितिमा रहने संख्यका बारेमा सत्तारुढ र प्रमुख प्रतिपक्षी दलहरुबीच विवाद देखिएपछि लामो समयदेखि नियमावली मस्यौदाले अन्तिम रुप पाउन सकेको छैन ।
आगामी जेठ १३ गते बस्ने संसद बैठकबाट नियमावली मस्यौदा पारित गर्ने तयारी स्वरुप दलहरुले छलफल सुरु गरेको नेताहरुले बताएका छन् ।
