काठमाडौ, १ जेठ ।
संसद सन्चालन सम्बन्धी नियमावली निर्माणमा देखिएको विवाद समाधानका लागि आज बिहान बसेको प्रमुख तीन दलको बैठक बिना निष्कर्ष टुङ्गिएको छ ।
प्रधानमन्त्री केपी शर्मा ओलीको आह्वानमा बालुवाटारमा बसेको बैठकमा दलहरुले आ आफ्नै अडानमा कायम राखेपछि छलफल टुङ्गोमा पुग्न नसकेको हो ।
आगामी जेठ १३ गते बस्ने संसद बैठकबाट नियमावली मस्यौदा पारित गर्ने तयारी स्वरुप दलहरुबीच छलफल सुरु भएको हो ।
लामो समय प्रयासपछि नियमावली मस्यौदामा दलहरुबीच सहमति जुटाउन नसकेपछि कांग्रेस सांसद राधेश्याम अधिकारीको अध्यक्षतामा गठन गरिएको नियमावली मस्यौदा समितिले विवाद सहितको प्रतिवेदन संसदमा पेश गरेको थियो ।
सुनुवाई समितिमा रहने संख्याका बारेमा सत्तारुढ र प्रमुख प्रतिपक्षी दलहरुबीच विवाद देखिएपछि लामो समयदेखि नियमावली मस्यौदाले अन्तिम रुप पाउन सकेको छैन ।
बैठकपछि एमाले प्रमुख सचेतक भानुभक्त ढकालले दलहरुबीच आन्तरिक छलफलपछि भोली पुनः बैठकबस्ने सहमति भएको जानकारी दिनुभयो ।
