काठमाडौ २८ वैशाख ।
नेपाल मजदुर किसान पार्टीका अध्यक्ष नारायणमान बिजुक्छेले स्वायत्तता र विकेन्द्रीकरण बिना कर्णालीको विकास हुन नसक्ने बताउनु भएको छ ।
जुम्लामा आज बिहान आयोजित कार्यक्रमलाई सम्बोधन गर्नुहुदै उहाँले केन्द्रले लादेको योजना अनुसार काम गर्दा कर्णाली पछि परेको बताउनु भयो ।
अध्यक्ष बिजुक्छेले पछिल्लो चरणमा विकास निर्माणका लागि छुट्याएको रकम दलले खाने गरेको आरोप लगाउँदै आफ्ना कार्यकर्तालाई कमिसन, घुसखोरी र भ्रष्टाचारमा संलग्न नहुन निर्देशन समेत दिनु भएको छ ।
त्यस्तै उहाँले देशको कूटनीतिक मर्यादा विपरीत क्रियाकलाप गर्ने भारतका लागि नेपाली राजदूत दीपकुमार उपाध्यायलाई कारबाही गर्नुपर्ने धारणा राख्नु भएको छ ।
राजदूत कुनै पार्टीको कार्यकर्ता नभई नेपालको प्रतिनिधि भएकाले सिङ्गो नेपाली जनताको भावना बोल्न सक्नुपर्ने उहाँको भनाई थियो ।
एक अर्को प्रसङ्गमा उहाँले नाकाबन्दीको सम्पूर्ण जिम्मेवारी मधेसवादी दलले लिनुपर्ने जिकिर गर्नुभएको छ । उहाँले नेता नेपालको बनेर भारतको इसारामा चल्ने काम बन्द गर्नुपर्ने बताउनु भयो ।
