दाङ ,२६ वैशाख ।
सिण्डिकेट विवादका कारण आज पनि राप्ती अञ्चलमा सार्वजनिक यातायातका साधन सन्चालनमा आउन सकिेका छैनन् ।
यातायात ठप्प हुँदा दाङ, सल्यान, रोल्पा, रुकुम र प्युठानको जनजीवन प्रभावित बनेको छ । नीजि सवारी साधन फाट्टफुट्ट चले पनि सार्वजनिक यातायात भने ठप्प रहेको हाम्रा सहकर्मीले जनाएका छन् ।
मालिका कालिका यातायात प्रालीले तुलसीपुर–रुकुम सडकखण्डमा गाडी सञ्चालन गर्न थालेपछि व्यावसायीबीच बिबाद भएपछि बिरोधमा हिजोबाट सार्वजनिक यातायातका साधन ठप्प पारीएको थियो ।
प्रालीका गाडीमा तोडफोड र झडपका क्रममा प्रहरीको लाठी प्रहारबाट तीन जना व्यवसायी घाइते भएपछि नेपाल यातायात व्यवसायी राष्ट्रिय महासंघ राप्तीले अञ्चलभर अनिश्चितकालिन यातायात बन्दको घोषणा गरेको छ ।
यातायात व्यवसायीको कार्यक्रमलाई समर्थन गर्दै तुलसीपुर उद्योग बाणिज्य संघले आज बजार बन्दको आह्वान गरेको छ ।
संघको आह्वानमा आज विहानैदेखि तुलसीपुरका व्यापार व्यवसाय बन्द छन् । व्यवसायीलाई घइते बनाउने प्रहरीलाई कारवाही नभएसम्म चक्काजाम जारी रहने महासंघले जनाएको छ ।
यसअघि राप्ती समितिले मात्रै दाङ–काठमाडौ बस सञ्चालन गर्दै आएकोमा मालिका कालिका यातायात प्रालीले पनि पुस १८ देखि डिलक्स गाडीहरु सञ्चालन गर्दै आएको छ । प्रालीले शुक्रबारदेखि रुकुममा पनि गाडी सञ्चालन गर्न खोजेपछि प्राली र समितिबीच विवाद सुरु भएको हो ।
तुलसीपुरबाट रुकुम जान थालेको प्रालीको गाडीलाई राप्ती समितिले अबरोध गरेपछि झडप भएको थियो ।
