काठमाडौ ,२४ वैशाख ।
आज मातातीर्थ औंसी अर्थात् आमाको मुख हेर्ने दिन । आमाप्रति श्रद्धा सम्मान र कृतज्ञता प्रकट गरी मनाइदैछ । हरेक वर्ष वैशाख कृष्ण औंसीलाई आमाको मुख हेर्ने दिनका रुपमा मनाउने गर्दछन् ।
भगवान विष्णुले मातृ वियोग भएका व्यक्तिहरुलाई मातातीर्थ कुण्डमा स्नान गर्न लगाई दिवंगद् मातालाई दर्शन गराएको धार्मिक विश्वासका साथ यो पर्व मनाउने गरिन्छ ।
आजका दिन बिहानैदेखि छोराछोरीले नुवाई धुवाई गरी आमालाई मीठामीठा परिकार बनाई खुवाउने तथा उपहार दिएर आशिर्वाद लिने प्रचलन छ । विवाह गरि गएका चेली आजका दिन आमाको मुख हेर्न माइती आउने गर्दछन् ।
आमा नभएकाहरूले आजका दिन आमालाई तर्पण र पिण्ड तथा पुरोहितलाई सिदादान सहित भोजन गराई दिवंगत आमाको आत्माको शान्तिको कामना गर्दै आमालाई सम्झिने गरिन्छ ।
राजधानीको थानकोटस्थित मातातीर्थमा दिवंगत आमाको सम्झनामा श्रद्धा तथा दान गर्न आज बिहानैबाट दशनार्थीको ठूलो भिड लागेको छ ।
आजका दिन मातातीर्थ स्थित कुण्डमा स्नान गरी दान गरेमा दिवंगत हुने आमाको छोरा छोरीले तिर्नु पर्ने ऋणबाट मुक्त हुने धार्मिक विश्वास रहिआएको छ ।
