काठमाडौ १६ वैशाख ।
सरकारले आजदेखि विद्यालय भर्ना अभियानमा छुटेका बालबालिकालाई लक्षित गरी घरदैलो कार्यक्रम सुरु गरेको छ ।
वैशाख २ देखि १५ गतेसम्म चलेको विद्यालय भर्ना अभियानका क्रममा छुटेका बालबालिका पहिचान गर्न कार्यक्रम सुरु गरिएको शिक्षा विभागले जनाएको छ ।
भर्ना अभियान चलाउँदा पनि भर्ना नभएका ५ देखि १२ वर्षसम्मका सबै बालबालिकालाई शिक्षाको पहुँचमा ल्याउन घरदैलो कार्यक्रम गर्न लागिएको विभागका महानिर्देशक खगराज बरालले बताउनु भयो ।
अनिवार्य शिक्षाको लागि सरकारले २०६१ सालदेखि भर्ना अभियान सञ्चालन गर्दै आएकोमा ११ लाख भन्दा धेरै बालबालिका अझैपनि विद्यालय बाहिर रहेको विभागको तथ्यांक छ ।
उनीहरुलाई शिक्षाको पहुँचमा ल्याउन सरकारले विभिन्न चेतनामुलक कार्यक्रम पनि गरिरहेको बरालले बताउनु भयो ।
चेपाङ्ग, दनुवार, किसन, माझी, मुसीवदिया, बोटे, कुसुण्डा, लेप्चा, राजी, सतार, धामी लगायतका पिछडिएका वर्गलाइ शिक्षाको पहुँचमा ल्याउनु चुनौती देखिएको छ ।
