बैशाख ६, काठमाडौं । नेपाली कंग्रेस संसदीय दलले राष्ट्रिय मुद्दा र जनताका सवालको सम्बोधनका लागि यथाशिघ्र संसद बैठक बोलाउन कंग्रेस संसदीय दलले माग गरेको छ ।
नयाँ बानेश्वरस्थित संसद भवनमा बसेको बैठकले सरकार जनताप्रति अनुत्तरदायी भएको आरोप लगाउदै तत्काल संसद बैठक बोलाएर जनजीविकाका सवालमा छलफल गर्नुपर्ने माग गरेको हो ।
भुकम्प गएको बर्ष दिनसम्म पनि पीडितमुखी पुनर्निर्माणको कार्यक्रम तर्जुमा गर्न नसकेको भन्दै सरकारको आलोचना गरेको छ ।
बैठकमा सांसदहरुले नाकाबन्दीपछि सरकार आफैंले कालोबजारीलाई प्रश्रय दिएको, जनताको दैनिकी र जनजिविकालाई नजरअन्दाज गरेको आरोप लगाएका थिए ।
सांसद रामहरि खतिवडाका अनुसार राष्ट्रिय मुद्दा र जनताका सवालको सम्बोधनका लागि संसद बैठक आवश्यक रहेको बैठकले निश्कर्ष निकालेको बताउनु भयो ।
बैठकमा सरकारमा सामेल दलहरुले न्यायालयमा गरेको हस्तक्षेपबारे पनि सांसदहरुले आवाज उठाउँदै प्रमुख प्रतिपक्षी दलको नेताका रुपमा पार्टी सभापति शेरबहादुर देउबाले कडा प्रतिवाद गर्नुपर्ने बताउनु भएको थियो ।
त्यस्तै बैठकले ट्रेड युनियनको आसन्न निर्वाचनमा पार्टी निकट संगठनबाट उम्मेद्वार बनेकाहरुको पक्षमा जिल्ला जिल्लामा अभियान सञ्चालन गर्ने निर्णय गरेको छ ।
