काठमाडौ ,३० चैत्र ।
पूर्वप्रधानमन्त्री एवम् नयाँ शक्ति नेपालका संयोजक डा बाबुराम भट्टराईले वर्तमान सरकार सबै क्षेत्रमा असफल भएको दावी गर्नु भएको छ ।
जनकपुरमा आज आयोजित पत्रकार सम्मेलनमा बोल्दै उहाँले अहिलेको सरकारले जनताको हितमा काम गर्न नसकेकाले प्रधानमन्त्री केपी शर्मा ओलीलाई सत्तामा रहिरहने नैतिक आधार नभएको बताउनु भयो ।
सरकारको गतिविधि र भाषा पञ्चायती व्यवस्था झैं भएको भन्दै भट्टराईले सरकार अराजकता, कालाबजारी, तस्करी र भ्रष्टाचारलाई प्रश्रय दिनमा लागेको आरोप समेत लगाउनु भयो ।
विगतमा भएको सहमति र सम्झौता तथा आयोग र संविधान सभाको समितिको सुझावका आधारमा मधेश समस्याको समाधान गर्नुपर्नेमा भट्टाराईको जोड थियो ।
पुरानो राजनीति र यथास्थितिवादको जगमा मुलुकको विकास हुन नसक्ने भन्दै उहाले नयाँ चिन्तन र शक्तिले राष्ट्रलाई समृद्धि बनाउन अग्रसर हुनुपर्ने धारणा राख्नुभयो ।
