काठमाण्डौ ,२८ चैत ।
राष्ट्रिय पुनरनिर्माण प्राधिकरणले भुकम्प प्रभावित आठ जिल्लामा आजदेखि आवास अनुदान सम्झौता गर्ने भएको छ ।
भुकम्पबाट अति प्रभावित १४ जिल्लामध्ये आठ जिल्लाका आठ वटा गाउमा आज सम्बन्धीत गाविसका सचिव लाभग्राहीबीच अनुदान सम्झौता हुदै छ ।
चैत २१ मा सार्वजनिक गरिएका आठ जिल्लाका भुकम्पपिडितले अनुदान सम्झौतामा हस्ताक्षर गरेर बैंकखाता खोलेपछि भत्किएको घर निर्माण गर्न पहिलो किस्तामा ५० हजार रुपैया पाउनेछन् ।
पहिलो किस्ता स्वरुप आजबाट अनुदान सम्झौता हुने जिल्लाहरुमा सिन्धुलीको झागाझोलि , काभ्रेको रवीओपि , नुवाकोटको खरानीटार , रामेछापको ओख्रेनी ,गोरखाको हंसपुर ,ओखलढुङगाको रुम्झाटार ,रसुवाको ब्रिदिम र धादिङको मार्पाक रहेका छन् ।
सिन्धुपाल्चोक र मकवानपुरमा स्थानीय राजनितिक दलले गाउँ छनोटमा विवाद गरेपछि लाभग्राहीको सूची सार्वजनिक हुन सकेको छैन ।
प्राधिकरणका अनुसार काठमाण्डौ उपत्यका सहित भुकम्प अति प्रभावित १४ जिल्लाबाहेकका १७ जिल्लामा समेत विस्तृत घरधुरी सर्वेक्षण कार्य सुरु गरि बर्षातको समय अगावै आवास अनुदान सम्झौता गर्ने तयारी भईरहेको छ ।
यसैबीच , प्राधिकरण निर्देशक समितिको बैठक आज बस्दै छ । प्रधानमन्त्री केपि ओलीको अध्यक्षतामा आज बस्ने समितिको बैठकमा भुकम्पपछिको पुननिर्माणमा एनजिओलाई पनि सामेल गराउने बिषयमा छलफल हुने छ ।
हिजो बसेको प्राधिकरणको बैठकले सरकारले तोकेको क्षेत्र र मापदण्डमा काम गर्न ईच्छुक गैरसरकारी संस्थालाई परिचालन गर्ने कार्यविधि बनाउने बिषयमा आज छलफल गर्ने गरी एजेण्डा तय गरेको थियो ।
