सप्तरी, चैत २६ गते । सिँचाई मन्त्री उमेशकुमार यादवले धार्मिक कार्यलाई विकाससँग जोड्नु पर्ने बताउनु भएको छ । मधेशमा धार्मिक पर्यटनको असाध्यै सम्भावना रहेको उल्लेख गर्दैै मन्त्री यादवले छिन्नमस्ता मन्दिरलाई धार्मिक पर्यटनसँग जोडेर सप्तरीको विकास गर्नुपर्ने कुरामा जोड दिनुभयो ।

सखडामा २०७३ चैतमा हुने श्री श्री १००८ लक्ष्यचण्डी रुद्र महयज्ञका लागि शुक्रवार मन्त्री यादवबाट भूमि पूजा सम्पन्नपछि भएको साँस्कृतिक कार्यक्रममा आफ्नो धारणा राख्नु हुँदै मन्त्री यादवले छिन्नमस्ता भगवतीको दर्शन गर्न लाखौ अन्तरिक तथा भारत विहारका आन्तरिक पर्यटक आउने गरेको तर त्यसको उचित व्यवस्थापन नभएको कारण सखडाको विकास नभएको बताउनु भयो ।

उहाँले भन्नुभयो, यहाँको कलासँस्कृति जोगाउने काम हामी सबैको हो । एकजना कुनै व्यक्तिले चाहेर पनि हुँदैन, यहाँसम्म कि कुनै मन्त्रीले पनि चाहेर हुँदैन सबैको इच्छा शक्ति हुनुपर्छ ।’

पूर्व मेचीदेखि पश्चिम महाकालीसम्म तथा माथी पहाडसम्मका भक्तजनहरु यहाँ छिन्नमस्तामा आउने गरेका छन् तर कोही यहाँ बास बस्न चाह्यो भने सकिदैन, कुनै धार्मिक पर्यटकलाई एक दिन रोक्न चाहियो भनि सकिदैन, दिसापिसाब गर्ने ठाउँ छैन, खानेपानीको राम्रो प्रबन्ध छैन, पसल तथा स्टलको राम्रो व्यवस्थापन छैन भन्नु हुँदै मन्त्री यादवले यी सबै कुरामा यहाँका स्थानीयवासी तथा मन्दिरका समितिले विशेष जोड दिनुपर्ने बताउनुभयो । धार्मिक पर्यटकलाई जोड्नका लागि राजपुर सडक बन्नुपर्ने कुरामा उहाँले विशेष जोड दिनुभएको थियो ।

कुनै पनि विकास कार्यमा यो दल वा त्यो दल भनेर हुँदैन, विकासका नाममा सबै दल मिल्नुपर्छ भन्नु हुँदै उहाँले झापाको उदाहरण दिदै भन्नुभयो, एकपटक हामी सिचाईको अनुगमनमा झापा जाँदा त्यहाँका जनतामा विकासका नाममा जुन एकता देखे त्यो दखेर म छक्क परे । त्यहाँ सबै दल मिलेर विकासका लागि तयार भएको मैले पाए । एउटै योजना, एउटै विचार लिएर उहाँहरु आउनु भयो र म बाध्य भएर त्यहाँ २२ करोड पठाउनु पर्यो । तर सप्तरीमा त्यस्तो देखिएको छैन । मन्त्री यादवले भन्नु भयो ।

कार्यक्रम छिन्नमस्ता मन्दिरका मुल पुजारी महादेव ठाकुरको अध्यक्षतामा भएको थियो । कार्यक्रममा भारत विहार लोकहा विधानसभाका विधायक लक्ष्मेश्वर यादवले पनि आफ्नो धारणा राख्दै महायज्ञका लागि आफूले सक्दो सहयोग गर्ने प्रतिवद्धता जनाउँदै यो महायज्ञले नेपाल र भारतको सम्बन्धलाई अझ बलियो बनाउने धारणा राख्नुभयो ।

यसमा तपाइको प्रतिक्रिया

सम्बन्धित समाचार