काठमाडौं, चैत्र २२ /राष्ट्रिय प्रजातन्त्र पार्टीका वरिष्ठ नेता डा. प्रकाशचन्द्र लोहनी र पूर्वप्रधानसेनापति रुक्मङ्गगद कटवाल भारत भ्रमण गरी हालै फर्कनु र सत्ताको तेश्रो ठूलो घटक राप्रपा नेपालमा भयंकर हलचल आउनुलाई संयोग मात्रै मानिएको छैन ।
समाचार श्रोतकाअनुसार भारतीय गृहमन्त्री राजनाथ सिंहले नेपालको राजसंस्था पुनर्बहालीको सिलसिलामा हालै दिल्लीमा गोप्य छलफलको आयोजनासमेत गरेका थिए ।
छलफलमा नेपालका तर्फबाट लोहनी र कटवालका साथसाथै संघीयता विरोधी कानुनविद् भीमार्जुन आचार्यलगायतको पनि उपस्थिति रहेको थियो । कम्युनिष्टहरूलाई कमजोर बनाउने र हिन्दूवादीहरूवीच ध्रुबीकरण गराउने अभियानअन्तर्गत उक्त भेला भएको बताइन्छ ।
धर्म निरपेक्षतावादी कम्युनिष्टहरूसँग मिलेर भारत विरोधी मोर्चाको सरकारमा सामेल भई कमल थापाले गद्दारी गरेको कुरा भाजपाका नेताहरूले भेलामा उठाएका थिए ।
उनीहरूले अब कमल थापालाई बाइकट गरेर नयाँ ध्रुबीकरणमा जानुको विकल्प नभएको सुझाव लोहनी, कटवाल र भीमार्जुनलगायतका विज्ञहरूले दिएको समाचार श्रोतले जनाएको छ ।
कांग्रेसको अधिवेशनमा शुभकामना दिन आएका भारतीय जनता पार्टीका नेता भगतसिंह कोस्यारीले कमल थापाले भेटका क्रममा गरिएको अनुरोध सुनेर पनि नसुने जस्तै गरेका थिए ।
थापालाई राप्रपा नेपालभित्रै अल्पमतमा बनाउने र वर्तमान सरकारलाई दिइएको समर्थन फिर्ता लिने रणनीति बनाइएको थियो । यसका लागि केशरबहादुर विष्टलाई अघि सार्ने निर्णयसमेत भएको थियो ।
