काठमाडौँ, १२ चैत ।
चीन भ्रमणमा रहनु भएका प्रधानमन्त्री केपी शर्मा ओलीले आज सियानका उपगभर्नर यु यिन लिङ र चाइना पिपुल्स पोलिटिकल कन्सल्टेटिभ कन्फ्रेन्सका नेताहरुसँग भेटवार्ता गर्नुभएको छ ।
सान्सी प्रान्तको सियानस्थित होटल साङ्ग्रिलामा आज भएको भेटवार्तामा उहाँहरुबीच दुई देशको आपसी सम्बन्ध र हितका साथै नेपालमा भूकम्पपछिको पुनःनिर्माण लगायतका विषयमा छलफल भएको बताइएको छ ।
भेटमा चाइना पिपुल्स पोलिटिकल कन्सल्टेटिभका तर्फबाट उपाध्यक्ष झेङ सि आओपिन र महासचिव झाओ जेनयोङ सहभागी हुनुहुन्थ्यो ।
सो अवसरमा प्रधानमन्त्री ओलीले नेपालमा हुन लागेको अन्तर्राष्ट्रिय बौद्ध सम्मेलनमा सहभागी हुन सियानका नेताहरुलाई निमन्त्रणा गर्नुभएको थियो । यस्तै चिनियाँ नेताले भूकम्पपछि नेपाललाई सान्सी प्रान्तले गरेको सहयोगका बारेमा जानकारी गराउनुभयो ।
प्रधानमन्त्री ओलीले आजै सियानको ऐतिहासिक तेरा कोट्टा सैनिक सङ्ग्रहालयको अवलोकन गर्नुभएको प्रधानमन्त्रीका प्रेस सल्लाहकार प्रमोद दाहालले जानकारी दिनुभयो ।
यस्तै उहाँले आज सियानमा उद्योगी व्यवसायीको फोरमलाई सम्बोधन गर्नुहुने र सियान मेडिकल युनिभर्सिटीको भ्रमण गर्नुहुने कार्यक्रम छ । प्रधानमन्त्री ओली आज साँझ सियानबाट छेङ्दु जानु हुनेछ ।
