विराटनगर, २९ फागुन ।
सूचना तथा सञ्चारमन्त्री शेरधन राईले वर्तमान सरकारकै नेतृत्वमा राष्ट्रिय सरकार बन्ने बताउनुभएको छ । विराटनगर विमानस्थलमा आज सञ्चारकर्मीसँग संक्षिप्त कुराकानी गर्दै उहाँले सरकारमा सामेल हुनुपर्ने वा प्रतिपक्षमा बसेर ऐतिहासिक अभिभारालाई पूरा गर्न सरकारलाई रचनात्मक सहयोग गर्नुपर्ने काँग्रेससँग दुइ विकल्प रहेको उल्लेख गर्नु भयो ।
उहाँले भन्नुभयो, “प्रधानमन्त्रीको चीन भ्रमणपछि सरकारले सबै पार्टीलाई सरकारमा सहभागी हुनका लागि आह्वान गर्नेछ र ती दल सरकारमा सामेल नभएको अवस्थामा सरकार आफ्ना मार्गचित्रको आधारमा अगाडि बढ्नेछ ।” मधेसी मोर्चासँग वार्ता सुरु भएको भन्दै उहाँले मधेसी मोर्चाको ११ बुँदे मागमध्येबाट कतिपय माग पूरा भइसकेको बताउनु भयो ।
सीमाङकनलगायतको विषयमा उहाँले भन्नुभयो, “गठित राजनीतिक समितिलाई पूर्णता दिनका लागि नेपाली काँग्रेससँग छलफल गरिनेछ र त्यसपछि राजनीतिक समितिले तीन महिनाभित्रमा तयार पारेको प्रतिवेदनको आधारमा सीमाङ्कनको समस्या समाधान गरिनेछ ।”
