काठमाडौँ, २७ फागुन ।
नेपाली काँग्रेसका नवनिर्वाचित महामन्त्री डा शशाङ्क कोइरालाले अस्थिर राजनीतिले मुलुक अघि बढ्न नसक्ने बताउनुभएको छ ।
महाराजगञ्जस्थित निवासमा आज बिहान नेपाल विद्यार्थी सङ्घ (नेविसङ्घ) को बधाई तथा शुभकामना ग्रहण गर्दै उहाँले अस्थिरताको राजनीति रहिरहे राष्ट्रनै सङ्कटमा पर्ने खतरा औँल्याउनुभयो ।
“अस्थिरताको राजनीति हामी कसैले गर्नु हुँदैन । गाउँ नगरको विकासका लागि स्थिरता चाहिन्छ । जबसम्म राजनीतिक र सामाजिक स्थिरता आउन सक्दैन तबसम्म मुलुकको विकास हुँदैन, त्यसैले मुलुकको सम्बृद्धिमा युवापुस्तालाई समाहित गरिनुपर्छ,”–महामन्त्री कोइरालाले भन्नुभयो ।
उहाँले राजनीतिक र सामाजिक परिवर्तनका लागि कटिबद्ध नेविसङ्घले शैक्षिक मुद्दालाई अघि बढाएर युवापुस्तालाई नेतृत्वदायी भूमिकामा ल्याउन विशेष भूमिका निर्वाह गर्नुपर्नेमा जोड दिनुभयो ।
महामन्त्री कोइरालाले पार्टीकोे जुझारु सङ्गठन नेविसङ्घको महाधिवेशन लामो समयसम्म नहुनु दुर्भाग्य हो भन्दै काँग्रेस केन्द्रीय समितिले पूर्णता पाएपछि पहिलो एजेन्डाको रुपमा महाधिवेशन प्रक्रियालाई प्राथमिकता दिइने प्रष्ट पार्नुभयो ।
नेविसङ्घका अध्यक्ष रञ्जित कर्णले लामो समयदेखि स्वतन्त्र विद्यार्थी युनियन (स्ववियु) को निर्वाचन हुननसक्दा नेतृत्व विकास र शैक्षिक आन्दोलन कमजोर बनेको बताउँदै स्ववियु निर्वाचन र नेविसङ्घको निर्वाचनको पहलकदमी गरिदिन महामन्त्री समक्ष आग्रह गर्नुभयो ।
